مواعيد سروح مراكب الصيد بالسويس

مجالس إدارات جمعيات العاملين بقطاع صيد الأسماك بالسويس فوجئوا بأن تعليمات مواعيد السروح للمراكب تبدأ من 6 صباحًا وتنتهي 6 مساء وذلك مع بدء موسم الصيد اعتبارًا من اليوم السبت 1 سبتمبر 2018". 

وأضاف كمال، أن تلك المواعيد لا تتناسب مع الصيادين وأصحاب المراكب وكافة حرف الصيد من الجر والشانشولا والسنار وغيرها، ما يكبد قطاع الصيد خسائر فادحة الأمر الذي سيؤدي لتعطيل القدرات الحقيقية لأعمال إنتاجية وصيد الأسماك.

وشدد نائب السويس، على ضرورة تعديل المواعيد بما يتناسب مع المهنة خاصة أن تلك المهنة لها أهمية للاقتصاد الوطني والثروة السمكية والتي يعمل بها أكثر من 3500 صياد و82 مركبًا و120 لنشًا و400 فلوكة صيد.

كان أيمن عمار رئيس هيئة هيئة تنمية الثروة السمكية أعلن فى 9 أغسطس الحالي عن بدء موسم الصيد اعتبارًا من الأول من سبتمبر.

تقرير رحلة صيد علي مركب رود رنر 5- بواسطة وائل صبحي

وائل صبحي

تقرير رحلة 23 و24 و25 شهر 8 :

عدنا بفضل الله من أجمل اجازه عيد قضيناها مع البحر مع البرنس محمد مبارك مبارك ومركب رود رانر 5 وأجمل صحبه رائعه 
أقسم بالله أسرع رحله خلصت وكأنها 3 ساعات مش 3 أيام 

الصحبة

• معالي المستشار محمد خليفه الذوق والأخلاق والشياكه 

• أ / احمد عبد اللطيف طوال الرحله بيتكلم عن العفاريت 😂

• ميسو محمود صابر صياد من العيار الثقيل برنس فعلا 

• أ / ماجد الأخلاق العاليه مستني اعرف نتيجه الاستاكوزا 😂

• مهندس محمود الأخلاق العاليه جدا صاحب أكبر سمكه 

• محمود الهواري فاكهة الرحله صياد الكاليماري الكبير 

• ومفاجأه الرحله د /عمرو الجراح الكبير خفه دم غير طبيعيه 

• وعم صبري طبعا رفيق كل الرحلات ونصي التاني 

بالرغم من الرزق مكانش كتير إلا أن أشكر الريس حامد مبارك علي المجهود الجبار هو والريس حسني

 لإرضاء واسعاد أعضاء الرحله وتصميمه بالرغم من ارتفاع سرعه الرياح علي التنقل بين الطرحات وبذل اقصي مجهود وتحمل أعباء فعلا لارضائنا قضينا احلي ثلاثه أيام مع الصحبه الجميله ضحك وهزار وصيد بجد شرفتونا يارجاله ويارب نكون عند حسن ظنكم دايما من اكتر المجموعات المتميزه اللي اتقابلت بيهم 
أشكر بالأخص البحريه الشطار 
شكر خاص جدا جدا جدا أخويا الريس محمد مبارك مبارك علي تعبه معانا في الرحله انا عارف انك تعبت في الرحله بس ده عشمنا فيك 

الشيف هشام علي اكله الرائع وابقي قولي رأيك في الفول اللي انا عملته تاني يوم الرحله 

محمد حسنى البطيخى بجد اسعتمونا خدمه علي أعلي مستوي من نظافه وتقطيع طعوم واهتمام بأعضاء الرحله علي أعلي مستوي 

أشكر حبيب قلبي الغالي الريس حسني أخونا الكبير 

أحب أنوه فعلا وانت علي مركب الريس حامد تحس انك في بيتك في مكانك راحه نفسيه وده مش جديد علي الريس حامد 
شكرا خاص معالي المستشار محمد خليفه علي روح التعاون والمساعده بجد احرجتني من شده اخلاقك العاليه 
من أجمل رحلات 2018 وده مش جديد علي الريس حامد 
سبحان الله علي الأرزاق راح من أيدينا سمكه ابو شراع واحنا خارجين علي المارينا ومتعه سحبها وهي بالطير في الميه والغريب

 أنها قطعت رابله ودخلت علي التانيه وخدتها برضه السمك بقي فاجر قوي حاجه متعه بجد بس الحمد لله 
اتمني بجد الرحله ديه بالأخص تتكرر تاني ونلتقي علي خير ان شاء الله 
شكرا خاص لملك الاسفلت ابو زياد دايما مشرفني ورافع رأسي 
وعم فلتر عم السواقين 
شكر خاص للحج علي الجبلاوي 
قريبا ان شاء الله غزوه شلاتين واللعب مع الوحوش يعني تعد صوابعك وتتم عليهم وانت مروح 😍

كيفية الحصول علي تصريح زودياك بالموتور

بواسطة Faras Fares

ححاول اجمع معظم خبرتى عن الموضوع وهو على فكرة تجربة فعلية وانا بنزل بيه من نقطه حرس حدود السادات ومعايا دفاتر سروح  الخطوات كالتالى:

اولا : الاماكن اللى بتتعامل معاها:

• معهد تدريب المؤانئ فى ابوقير فى الاسكندرية
•  التفتيش البحري بالسويس فى بورتوفيق
• وحدة حرس الحدود التابعة للمنطقة اللى بتنزل فيها تقريبا لحد الزعفرانة منطقة حرس حدود فى الغريب فى السويس

ثانيا : الورق المطلوب :

• رخصة قيادة وحدة بحرية خاصة ودى بتطلع من معهد تدريب الموانئ بالاسكندرية 
•  الزودياك ليه شهادة منشأ
•  الموتور ليه افراج جمركى وفى ناس بتقول كفاية الفاتورة من مكان الشراء بس مش متاكد

ثالثا: الخطوات :

• تجيب الورق المطلوب دة وتروح على التفتيش البحري فى السويس ومعاك الزودياك والموتور والرخصة وعدد لايف جاكت على قد الافراد وبتحسبة فرد لكل متر طول من الزودياك يعنى زودياك 3 متر يرخص ب3 افراد من التفتيش البحري وتعمل حسابك فى حوالى 500-700 جم مصاريف ترخيص سنوى وتاخد الترخيص الملاحى للزودياك
• تطلع بمستنداتك مع الترخيص الملاحى على وحدة حرس الحدود التابعة ليك وتجيب عدد 2 دفتر لونهم اصفر مجلدين بيبعهم صياد هناك بحوالى 70 جم وتدفع 150 جم تصريح سروح للزودياك لمدة 3 شهور السنة اللى فاتت كان ب 52 جم بس
• تاخد دفاترك وزوديكك وموتورك وبطايقك وتطلع على وحدة حرس الحدود وينزلوك تصطاد وتطلع قبل المغرب 

رابعا:  ازاي احضر الورق المطلوب بالتفصيل بس انا عملتها من 5 سنين بس خدوا بالكم الاسعار اختلفت وبرضة ممكن تكون ارقام التليفونات اتغيرت رخصة القيادة هتصرف فى حدود 1800 جم :

• أولا تتصل بمعهد تدريب الموانئ باب 27 الجمرك فى القبارى الاسكندريه يعنى فى المنطقه الجمركيه تبع الاكاديميه العربيه للعلوم والتكنولوجيا وارقامهم هيه 03/4833144, 03/4843859 وتعرف ميعاد الدورة وهيه كل شهر مرة 3 ايام 
• تروح فى اول يوم وتدفع 1500 جم بس وتحضر 3 ايام.
• بعد 21 يوم بتاخد من عندهم شهاده باتمام الدورة الثلاثه ايام .

وبتحضر الاتى :

1.  فيش وتشبيه باسم الهيئه المصريه لسلامه الملاحه البحريه(وده للرخصه المهنى فقط ) .
2. كشف طبى باطنه ونظر مختوم بختم النسر من مستشفى حكومى
3. 3 صورة شخصيه
4. صورة شهاده الميلاد
5. صورة شهاده التجنيد
6. صورة شهاده الدورة تعليم قياده العائمه
7. جواب من التامينات( للرخص المهنيه فقط وليست الخاصه) مبلغ 25 جم

وبعد تجهيز المطلوب تروح على باب 22 تطلع تصريح دخول الميناء فى نص ساعه وبعدين تطلع على باب 1 تدفع ال25جم وتطلع الرخصه .
بس المهم تروح بدرى لان التفتيش بيفتح 9 ويقفل تقريبا 12.5 ظهرا

ثانى خطوة :

•  الزودياك طوله 3.50 متر ومعاة منفاخ قدم واتنين مجداف ووحده تصليح وله ارينا نفخ وارضيه خشب مش الومنيوم بس مدهونه كويس بمواد عازله للماء بالنسبه للسعر تقريبا فى حدود 4200 جم

• الموتور ياماها من التوكيل - 9.9 حصان 2 ستروك 2بحوالى 14800 جم أو البارسون 15 حصان 4 ستروك بحوالى بعشرة الاف بس ممكن تعمله زياده فى الترسه بتاعه الزودياك علشان يقلل الطول .

• الموتور لازم يكون معاة افراج جمركى وفاتوره

• الزودياك اذا كان بفاتورة بس مينفعش فى التفتيش البحرى للترخيص لازم شهاده منشا يااما تخلى الشركه المصنعه تعملها يا اما تشتريها

ثالث خطوة (ترخيص الزودياك ) :

•  بتخلص تقريبا فى يومين يوم للتسجيل ويوم للمعاينه بس يكون الورق جاهز وهو:

1. رخصه القياده الخاصه وصورتها .
2.  اصل فاتورة الموتور مع الافراج الجمركى .
3. الافراج الجمركى للزودياك لو مستورد او شهاده منشا لو محلى او مستعمل .

والمصاريف كالاتى :

- 90 جم مصاريف تسجيل اول مرة
- 30 جم تامين اجبارى لكل فرد على المركبه البحريه
- 50 جم م معاينه
- 50 شهاده طفايه ولو عاوز تشترى الطفايه من عندهم بحوالى 120جم.
- 30 جم عوائد سنويه

• وطبعا اعمل حسابك ان فى اكراميه للمهندس بتاع المعاينه وطبعا تضبط معاة علشان يوم المعاينه يعنى قبل ماتشيل الزودياك والموتور وطبعا لازم يكون فيه لايف جاكت على قد عدد الافراد وارقام تفتيش السويس062/3191359 , 062/3912275 .
• وكمان علشان الزودياك 3.50متر أحيانا المهندس بيتنشن ويخليه 3 افراد بس لانهم بيقولوا فرد لكل متر طول

رابعا خطوة (حرس الحدود) :

تجهز صور تسع اوراق فى 3 دوسياهت منفصله :
1- صورة الزودياك فوتوغرافيا وعليه اسم الزودياك اللى انت هاتسميه فى شهاده المنشا .
2- صورة فاتورة الزودياك مع الافراج الجمركى .
3- صورة شهاده منشا الزودياك او الافراج الجمركى بتاعه .
4- صورة رخصه القياده .
5- فيش باسم (مكتب مخابرات حرس الحدود) .
6- صورة البطاقه .
7- 3 اوراق خاصين برخصه الزودياك .
8- عدد اتنين دفتر .
9- استلم الرخصه ومبروك عليك

تقييم مركب علي السني

تقرير و تقييم رحلة صيد حماطة

• المركب:علي السني
• التاريخ: ١٦، ١٧، ١٨ اغسطس ٢٠١٨ (٣أيام)

التقييم	المراد تقييمة
**	ريس المركب
***	بحرية المركب
***	شيف المركب
***	تجهيزات المركب
*	نظافة المركب

التقرير:

وصلنا الساعة ٩ ص للمارينا و عبينا وكل شيء و اتحركنا شمالا حوالى ١١.و محاولة للجر ف عز الظهر بلا نتيجة . صيد خفيف اول يوم من بعد ٨ مساءا بدون تحركات و بيات فى اول مكان و نوم لنص الفريق لتعب السفر و حماس لليومين التاليين تانى يوم بداية الصيد ليلا و النتيجة بعض البهار و الكوشر لا باس به تالت يوم صباحا التحرك لمكان تانى و جر اثناء التنقل بلا جدوى و مكان قريب من المرسي عمق ١٥ متر و تقطيع خيوط بالنهار و بعض الكوشر و ترقب لليلة صيد قوية و تمر الليلة بلا جدوى و عودة للميناء ٧ صباحا اعذرونى للملخص و لكن

 ساختصر التقييم فى النقاط التالية النقاط الايجابية فى راى الفريق:

•  لا توجد نقاط مميزة المركب فلوكة صغيرة و محملة بجراكن و مساحتها صغيرة وصفها احد الزملاء بانها مركب روبابيكيا بالنسبة لمراكب حماطة او الغردقة . مستوى النظافة صفر كبير صراصير من الحجم الممتاز و الحمام متسخ عند دخول المركب و طوال الرحلة
•  لا يوجد دش او شطاف للاستحمام .
•  مستوى الاكل لا باس به 
•  لا توجد معاونة لتقطيع او تجهيز الطعم اثناء الصيد و طاقم المركب بالامام للصيد لنفسهم و الشاى حسب الطلب

 . تم الاتفاق مع الريس على ١٠٠٠ ج اضافية تشجيعية مقابل الذهاب لاماكن ابعد و الجر و للاسف لم يتم ذلك فالتحرك كان محدود و فى نفس مكان الوقوف و المركب بطيء جدا يعطيك احساس انه سافر ل ٥٠ كيلوا و هو لم يسير ٢٠ كم شمالا فقط و العمق لم يتجاوز ٣٥ متر اسوا شيء حدث فى اخر ليلة صيد و التى انتظرناها قريبة من المارينا على ١٥ متر حيث تم تشغيل المولد طوال الليل وحتى الصباح لم يغلق بالرغم من وجودنا على عوارى و كان تعليمات المساعد حمادة الليلة السابقة بان الصوت يهرب السمك فما بالكم بصوت المولد على ١٥ متر حتى ان الحصيلة كانت صفر لم يتم التحرك من المكان رغم وضوح الصورة اول الليل وطلبنا اغلاق المولد فى موعده و رفض المساعد لان الطاقم نازل غدا اجازة العيد و لازم البطاريات تتشحن طب صحى الريس يا عبده لا ما ينفعش بعد ١٢ طب عاوزين نتحرك لا ما ينفعش حوالينا شعب و احنا بالليل و كل ده و الريس نايم و قال ممكن اطفى المولد بس النور هينطفى يعنى تصطاد فى الضلمة و لكم تقييم ذلك النتيجة ان الريس ضحى باخر ليلة مقابل انه يشحن البطاريات علشان بعد ما يرجع من العيد الدنيا تبقي تمام و طظ فى الناس اللى جاية من الف كم و دافعة فلوس فى الصباح و الساعة السادسة بدا التحرك دون تنبيه احد او حتى اعطاء فرصة لاول النهار تم مناقشة الريس صباحا ووعد بتعويض الفريق يوم مجانى الرحلة القادمة و لكن بعد مناقشة الفريق الكل رفض لان الثقة فقدت التقييم العام لهذا المركب سيء و لا يجوز ان يتواجد فى مكان ك حماطة و افضل مكان لحالته هذه الا يتجاوز السويس الريس كان غير مهتم و لم يسعى لانجاح الرحلة و كان همه الوحيد الحصول على اغلب مستحقاته قبل التحرك هذ ا ما حدث سلبا و ايجابا ان وجد دون زيادة او نقصان واعتقد انها اول و اخر رحلة للفريق على هذا المركب . هذا التقييم و التحذير من هذا المركب دون تجريح او اساءة لاحد. ويطالب الفريق من الريس الان برد مبلغ ١٠٠٠ ج التشجيعية و كذلك رد ٢٦٠٠ ج مقابل اخر يوم التى حصل عليها بدون وجه حق و شكرا

رد الريس علي السني علي التقييم :

اولا كل عام وانتم بخير 
ثانيا ..انا هاعلق على الكلام ده وطبعا الكل عارف بانى ماباخشش اعلق وادافع عن نفسى وباخلى اللى يقول يقول ..
ولكن نية التعليق هنا ان انا باشوف ان فيه ناس مجرد ماتشوف شكوى من اى حد تلاقيهم يدخلوا ويزموا حتى لو لم يكن يعرف طرفين الشكوى وكمان لم يسمع من الطرف الآخر ..!!!
عموما ليس الهدف من ردى هذا الدفاع عن المركب او شخصى ولكن هو رد على بعض الناس اللى بتتسرع وبتحكم وكمان بتشتم وللاسف ده مستوى من الاخلاق لايجب وجوده فى اناس مسلمه اوغير مسلمه هذا هو محور حديثى واقسم بالله العلى العظيم باننى لايهمنى الدفاع على المركب او الدفاع عن نفسى ولكن هاذكر التفاصيل من اجل اعطاء درس لمن يدخل وبيجرح فى الناس بدون مايعرفهم او يعرف الحقيقه واسمحولى بالاطاله لاننى لن ادخل واعلق تانى ..انا بس حبيت اوصل رساله للناس اللى بتغلط فى ناس مايعرفوهمش او عرفوهم ولاكن اساؤو فهمهم...

اولا ..انا دايما باقول لك قبل ماتحجز معايا ان مركبى صغير يعنى فلوكه ..وطبعا السعر اللى بتدفعه بياكد ذلك ...
ولكن من هنا بتيجى المشاكل لما الهاوى ييجى ويشوف حجم المركب بتبدا التزمر وخصوصا لوكان هاوى سياحه ...وطبعا انا ناشر على جروب المركب كل المواصفات وكمان كاتب انها فلوكه رغم ان مافيش فلوكه فيها ٨ سرير وصن ديك ودومان علوى ....
تانيا ...انت تعبت ونمت طول الرحله نقول ربنا يشفيك .ولكن غيرك قعد واصطاد ومبسوط...

موضوع مشوار ال ١٠٠٠ج اللى هو ابوغصون طبعا روحناه وواضح انك نمت طول الرحله لاننا قعدنا هناك يومين ....

موضوع انى عرضت على الاستاذ /وحيد عبد العزيز اللى هو انتم انتخبتوه علشان ينوب عنكم انا عرضت عليه وقولتله يبلغكم بان لكم رحله فيها يوم بدون حساب ..العرض ده موش زى ماانت فاكر انه بسبب تقصير لا ..ده لو انت كنت صاحى كنت هاتعرف اننا فقدنا فى بحر ابو غصون 2 بروسى واصبح معانا واحد فقط فااضطريت انى ابات واقف فى مكانى آخر ليله بعد ضياع الاتنين فى اخر يوم ليه لانى ممكن اجى اشيله علشان انقل هو كمان يروح وبكده موش هايكون معانا حاجه توقف المركب ورغم ان ده قضاء وقدر لان نادر جدا ان يضيع 2 بروسى فى نفس الرحله .ورغم كده انا تحملت يوم مجانى لانى ماكانش ينفع انقل بيكم اخر ليله ببروسى واحد وده للامان اللى هو اهم من اى شيئ...ولاتنكر ان فى المكان اللى بيتنا فيه شد منكم سمك ماحدش قدر عليه وانا كنت قايل الكلام ده قبل مانقف فى المكان والشاهد على ذلك مسؤل رحلتكم ....

اخيرا الفلوكه ليها ناسها وبيبقوا مبسوطين وموش شرط يكونوا فقراء وموش قادرين على ايجار اللانشات الكبيره ده للى فاهم صيد ...
ورغم ماتقول فان مسؤل رحلتكم قدرنا معنويا وماديا فى آخر الرحله وانا ردا لهذا التقدير وعوضا عن عدم النقل اخر ليله عرضت عليه ماتم ...

ولا تنكر ولاينكر اى فرد فى الرحله وهم موش موجودين فى البوست اننى التزمت معكم طول ايام الرحله بالنقل ليلا حتى الساعه ال 12 ليلا ماعدا اخر ليله نظرا لضياع البروسيات..

والله ماكتبته ابتغى رضا الناس من اجل رزق فرزقى على الله 
والله مااحاول ارضاء الناس الا لله وعملا بقول رسول الله صلى الله عليه وسلم (من عمل منكم عملا فاليتقنه) 

وعفوا انا لن ارد على اى تعليق واللى عاوز يشتم يشتم براحته فانى افوض الامر لله ان الله 
بصير بالعباد ..
ولايشغلنى موضوع الرزق..

الدنيا ساعه فاشغلها فى الطاعه

تعقيب صاحب التقرير علي رد الريس علي السني:

شكرا حاج على لحسن اسلوبك و الف سلامة عليك 

و هذا البوست طلب منى جميع اعضاء الفريق وضعه و ليس راىء واحد فقط

انا اتكلمت فى نقاط سلبية و ايجابية

موضوع النضافة و الصراصير ده ملوش علاقة بحجم المركب 

موضوع اخر ليلة كاملة علشان شحن البطاريات و تشغيل المولد طوال الليل و ضياع اخر ليلة بدون تنقل رغم وضوح الصورة اول الليل واضح .
اتقان العمل و السعى
عليه يتوجب الا اتقاضي شيء بدون وجه حق

اعتقد ان خبرتك ف البحر تعرف منها ان عوامل نجاح اى شخص هو الصدق و الالتزام طوال الرحلة و ليس ليوم واحد فقط

كيفية اختيار لون الطعم الأصطناعي (lure)

الجميع تقريبا يعلم اهمية لون اللور في الصيد و لكن القليل من يدرك أن هذا اللون يتغير لونة مع الأعماق تحت المياة نتيجة للأنعكاسات و الانكسرات الضوئية

اللوان اللور مع الأعماق 

اللوان اللور مع الأعماق 

اللوان اللور مع الأعماق 

نصائح مهمة:

• اللون الأحمر و البرتقالي  تجنبوهم في الأعماق لأنعدام رأيتهم 

الفيديو :

معلومات عن السنار

احجام السنار:

البعض بيتلخبط من أرقام السنار وعلاقتها بحجم السنار ويمكن تبسيط المسألة كالتالي:

• السنار الذي يحمل رقم صفر (0) يكبر كلما زاد الرقم والعكس صحيح في الذي لا يحمل الرقم 0

          مثال: السنار 0/4 أكبر من 0/3 والسنار 0/3 أكبر من 0/2

• السنار 4 أصغر من 3 والسنار 3 أصغر من 2

وهذا النظام هو نظام عالمي متفق عليه في جميع شركات تصنيع السنار على مستوى العالم

• لا يشترط تساوي الحجم في الأرقام المتساوية للسنار المصنوع من شركتين مختلفتين فمثلا السنار 0/4 النرويجي الموستاد Mustad لا يشترط أن يكون نفس حجم السنار 0/4 الياباني جاماكاتسو Gamakatsu

• أغلب توصيات حجم السنار في مجال الصيد التي قد تجدها في الكتب والمجلات تعتمد على مقياس السنار الموستاد Mustad النرويجي

قوة السنار:

قوة السنار هو المعدن والسماكة التي يتمتع بها السنار فالسنار الياباني مثل الأوسكار من الأستانلس ولكنه قابل للثني كما ذكرنا اما الفرنسي فيدخل في تصنيعه جزء من مادة الفولاذ ومعلومة قديمة:

اذا أردت تحويل السنار الأستانلس الى فولاذ قم بتسخينه على النار الى درجة الأحمرار ثم أغطسه في ماء بارد وهكذا لن ينثني الا بالكسر وقوة السنار غالبا مدونة على اغلب عبوات الميادير وترمز بعلامة X فمثلا 3X اقوى من 2X وهي ترمز لمساكة السنار نفسه ولكنها لا تدون غالبا الا في العبوات الياباني

رد فعل السمكة مع السنار المستقيم او الذي بة التواء :

انواع السنار و استخدماتة:

الغرض	السنار:ذو الساق الطويل
الأسماك ذات الأسنان الحادة لا يمكن التعامل مع أسنانها بالخيوط العادية بل ومنها ما يقطع اسنانه سلك الصيد المعدني لذلك هناك السنار او الميدار ذو الساق الطويل حتى لا تطول أسنان تلك السمكة الخيط فتقطعه وثاني عامل هو صغر الفم برغم كبر حجم السمكة فهو ذو فتحة ضيقة نسبيا لأكي تستطيع السمك أبتلاع الطعم من اول اكلة .

الغرض	السنار:الملتوي
هناك احوال من الطقس البحري ووجود بعض التيارات البحرية المتغيرة تمنع السمكة من الأكل بشراهة او بمجرد أكلها للطعم تقوم بطرده من فمها وهذا هو المطلوب للصيد بالسنار او الميدار الملووء فبمجرد محاولة اخراج السمكة للطعم من فمها يقوم بالألتفاف ليعلق في جانب او فوق او تحت فمها وهو مصمم أيضا للسمك ذو الفم العضمي

الغرض	السنار:ذو الحربتين
هناك انواع من الطعم من كثرة الحركة التحتية في المياه ينزلق من السنار وخاصة مع اهتياج البحر او وجود تيارات مائية ومثل هذا الطعم الروبيان والدود لذلك قامت شركات تصنيع معدات الصيد بتطوير الميدار ذو الحربتين في أخر الساق حتى لا ينزلق الطعم وخاصة ان الحربتين معكوستين عند ادخال الطعم لهم بكل سهولة ولكن وقوعه او انزلاقه من الصعب لأن الحربتين معكوستين في عكس اتجاه اخراج الطعم من السنار

الغرض	السنار:فرنسي
هناك بعض الأسماك ذات الفم العضمي او الفك القوي لها قضمة قوية تستطيع ان تكسر السنار لذلك طورت الشركات معدن بعض السنانير لكي لا ينكسر بسهولة معدن مخلط بالفولاذ وذلك مثل السنار الفرنسي فهو من الصعب كسره من فم سمكة

الغرض	السنار:ثنائي او ثلاثي متلاحم
بعض الأسماك لا تأكل الطعم بكل سهولة بل تلحس الطعم بل وترغب في الطعم الطري اللين الذي لا يستطيع مقاومة حركة المياه والشد والجذب لذلك وجد السنار الثلاثي وهو ثلاثة سنانير متلاحمين لكي تضع الطعم على الخيط وتسحب بالسنار وتشبك السمكة من ذيلها او يطنها او فمها .

الغرض	السنار:ثنائي او ثلاثي متلاحم
نوع من الأسماك ذات فم رقيق جدا بحيث ان السنار بمجرد دخوله فمها ممكن ان ينفك بسهولة ونوع اخر يتحسس الطعم قبل الأكل فان وجد سن يشكه فأنه يبتعد عن الطعم ولك هذه الأنواع السنار ذو السن الملووء قليلا بحيث اذا اكلت السمكة الطعم لا يخرج من فمها وهو متخصص لطريقة الصيد بالشد المفاجيء من الصياد ( الشكم ) حتى انه اذا دخل فم السمكة لا يخرج بسهولة .

تقييم مركب سماحة-الغردقة-أحمد عبد السلام

تقرير رحله الغردقة بواسطة أحمد عبد السلام 

التاريخ :28,29,20,31 /07 /2018
المركب : سماحة

التقييم:

• * أقل تقييم
• ***** أعلي تقييم

التقييم	المراد تقييمة
*****	ريس المركب
*****	بحرية المركب
*****	شيف المركب
*****	تجهيزات المركب
*****	نظافة المركب

• الريس العالمى اشرف حادى من اجمد الريسه فى البحر الاحمر 

كان يقول لنا حضروا عده معينه علشان احنا حنطرح فى مكان معين وحناخد منه سمك ايه بنوعه بالتحديد ويحصل اللى قاله بالضبط وهو هادى جدا واثق بنفسه مريح جدا فى التعامل معاه اللى انت عايزه بيحصل من غير ماتطلبه فاهم شغله كويس جدا اول يوم حصيله الصيد كانت سمك صغير متنوع لكن بسبب ان الهوا كان عالى ومن ثانى يوم على المغرب الهوا ظبط بشكل كبير واتحرك ليلا للشغل الصح علشان نلحق الفجريه فى مكان هو عارفه كويس وقالى ريحوا نفسكم علشان الفجر فى شغل ريحانله حيكون متعب شويه وفعلا حصل حوالى 12جرم بياض فى حدود من 4ك/8ك و واحد 11ك غير الشرايف كانت كتير فى حدود 3/4ك وفى نفس اليوم يقول لى حضروا ويرات علشان البركودا احنا رايحين ارضها وفعلا حوالى 25/30سمكه بركودا غير المحاسن وغير الشعور كانت ملحمه بركودا لدرجه احنا قولنا له خرجنا ممعناش ايس بوكسات للسمك ده وطلب لنا 3ايس بوكس فووم وشال السمك فى ثلاجه المركب واحب اوضح ان الانش وهو غنى عن التعريف مجهز ومستعد لاى شى خاص بالصيد اما

•  تقيم الانش نظافه 10/10

•  بحريه10/10

اخصهم بالاسم احمد جادالله بحرى بدرجه ريس خبير فى البحر الاحمر وابراهيم بحرى شعله نشاط فى خدمه اعضاء الرحله

• الشيف محمود الشافعى

احلى اكلت سمك كلتها فى البحر الاحمر منه نفسه فى الاكل فوق الوصف

• اعضاء الرحلة

الصياد بالفطره ابنى عبد الرحمن فتحى قوطه وابن صاحبى فتحى قوطه العالمى فى صيد السمك 

واحب اشكر اعضاء الرحله على التفاهم والمساعده فى كل شئ:

• علاء حنفى
• احمد شحاته 
• محمد شحاته محمد الحسينى  
• سامح الغزولى محمد القصبجى
• اسلام القصبجى 
• جون

اعضاء الرحلة و الحصيلة

 وربنا يشهد انى اقول الحق مع العلم انى قد اكون نسيت شئ واحب اخص بالشكر رائيس هذه المنظومه الناجحه الحج عبد الباسط قوطه اللى بيذلل كل المعوقات وهو اخ فاضل لى وأسف على الاطاله مع العلم ان الصور المضافه للبوست جزء من حصيله الصيد وليست كل الحصيله وشكرا لكم جميعا